Academy yatinga fainali ya Rolling stone

Timu ya Azam
Academy imeingia fainali ya mashindano ya Rolling stone baada ya kuifunga Simba B, 1-0 katika mchezo wa nusu fainali uliochezwa leo jioni katika uwanja wa Sheikh Amri Abeid jijini Arusha.

Goli pekee la Academy lilifungwa na Ibrahim Rajab 'Jeba' na kuivusha timu hiyo wakati mchezo wa nusu fainali nyingine umeshuhudia Ruvu Shooting wakiiondoa Coastal Union kwa goli 1-0 na kufanikiwa kucheza fainali dhidi ya Azam Academy.

Azam Academy imeingia fainali ikiwa haijafungwa hata mchezo mmoja katika mashindano hayo yanayo andaliwa na taasisi ya kukuza na kuendeleza michezo ya Rolling stone iliyopo Arusha na kujumuisha timu za kutoka Afrika Mashariki.

Katika mchezo wa fainali Azam FC itamkosa mchezaji Jeba aliyepewa kadi nyekundu, akizungumzia kumkosa mchezaji huyo ambaye ameifungia timu hiyo magoli matatu katika mashindano hayo,

Manager wa Academy, Phillip Alando amesema pengo lake litazibwa na wachezaji wengine. “Kumkosa Jeba katika mchezo wa fainali kutaleta mapungufu kidogo lakini tutajitahidi kuweka wachezaji wengine walio na uwezo kama wake ili kuhakikisha tunaendeleza ushindi kwani tunaamini tutashindi mchezo wa fainali.” alisema Alando.

Alando ameongeza kuwa kama kikosi hicho kitashinda mechi yake ya fainali kitakuwa kikosi bora kwa kushinda michezo yote katika michuano hiyo kutokana na timu zote walizocheza nazo zilikuwa timu imara, bora na zenye wachezaji walio na uzoefu kuliko Academy ambayo inaundwa na wachezaji chipukizi.

Katika mechi zake za awali Azam Academy ilizifunga CDIT ya Arusha 4-0, JKT Oljoro 2-1 na TST kutoka Mwanza 1-0.