Redondo arejea kundini

Ramadhani Chombo

KIUNGO Ramadhani Chombo Redondo, amejiunga na timu yake ya Azam FC kwa mazoezi na kusisitiza anaelekeza nguvu zake katika mechi za Ligi Kuu Bara zilizobaki, lakini amegoma kuzungumzia sakata lake na timu ya Msumbiji.

Hata hivyo, kocha wake, Stewart Hall, ameeleza kuwa bado anaendelea kumwangalia kama anaweza kuendelea kuwepo kikosini mwake kwa mara nyingine.

Redondo amekumbwa na mikasa ya utovu wa nidhamu ambayo ilisababisha kusimamishwa kikosini hapo kwa vipindi kadhaa. Pia aliwahi kutoroka katika kikosi hicho na Mwanaspoti lilinasa habari kuwa Redondo alikuwa Msumbiji anakodaiwa alipewa fedha za usajili na kuingia mkataba na timu ya Ferroviario Beira ya huko.

Akizungumza na Mwanaspoti, Redondo alisema: "Kama unavyoona nipo kwenye mazoezi, nguvu zangu ni kwenye mechi za ligi zilizobaki."

Kuhusu kutokomea kusikojulikana, alisema: "Jambo hili sijawahi kulitolea maelezo nilikuwa wapi, kwa hiyo, naomba libaki kama lilivyo hadi utakapofika muda mwafaka."

Naye Stewart alisema: "Redondo tuko naye, lakini mambo mengine yanaendelea, naendelea kumwangalia kwanza, ukifika muda mwafaka kila kitu kitakuwa wazi."

Wakala aliyeweka wazi suala la Redondo kuchukua fedha za Ferroviario Beira, Ashraf Maridadi, alisema: "Tulizungumza na watu wa Azam na taarifa hizo zinafanyiwa kazi zaidi."


source: mwanaspoti