EDO: KUNADHAMBI GANI AZAM KUTWAA UBINGWA

 
HAKUNA dhambi yoyote kwa Azam kuchukua ubingwa. Sijaiona dhambi hiyo bado. Kama unaweza kucheza mechi 25 kati ya 26 na bado haujafungwa mechi hata moja basi una kitu cha ziada zaidi kuliko wapinzani wako.

Kuna maneno ya chini chini kwamba huenda Azam imefanya hujuma za hapa na pale katika kupata ubingwa. Lakini ukweli unabaki pale pale kwamba Azam ilistahili kutwaa ubingwa kwa sababu zifuatazo.

Wamecheza mechi nne dhidi ya Simba na Yanga katika Uwanja wa Taifa. Mbele ya mashabiki wanaomzomea Kipre Tchetche na wachezaji wote wengine wa timu hiyo. Lakini pamoja na kelele hizo Azam imepoteza pointi mbili tu za sare yao ya pambano la pili dhidi ya Yanga.

Wameichapa Simba mara mbili. Wameichapa Yanga mara moja. Wametoka sare moja na Yanga. Kwanini nimetoa mfano wa Simba na Yanga tu? Kwa sababu mashabiki wa timu hizi mbili wanaamini kwamba wao tu ndio timu zao zinastahili kuwa mabingwa.

Lakini hizi mbili za Dar es salaam ndio zina matumizi makubwa ya pesa katika dirisha la uhamisho. Ndizo timu ambazo katika magazeti zinaongoza kwa kufanya usajili wa mamilioni nchini. Kama unaweza kucheza nazo mechi nne mbele ya mashabiki wao na washindwe kukufunga ujue kuna kitu cha ziada kipo.

Hata hivyo, hakuna dhambi kwa Azam kuchukua ubingwa kwa sababu Simba ilijifuta katika mbio za ubingwa kabla ya kuanza kwa Ligi Kuu Bara. Walifanya usajili mara tatu ndani ya dirisha moja wakianzia usajili ule wa kitoto walioufanya kwa kusajili wachezaji watoto watupu.

Niliwahi kuandika katika makala moja kwamba aina ya usajili wa Simba ungeziacha Azam na Yanga zikiwania ubingwa. Na kweli hawakufika mbali. Wachezaji wao makinda wakakata pumzi mwishowe akabaki Amiss Tambwe peke yake.

Yanga walikuwa na timu nzuri, lakini kama ilivyo kawaida kwao, walitibuana kila wiki. Wachezaji watano au sita walishutumiwa kuhujumu timu kwa nyakati tofauti ukianzia kwa Ally Mustapha ‘Barthez’, Nadir Haroub ‘Cannavaro’, Kelvin Yondani, Juma Kaseja, Athuman Idd, Emmanuel Okwi na wengineo.

Waliporudi kutoka Al Alhy walikuwa wamevimba kichwa na jinsi walivyocheza mechi zao mbili vizuri.

Hawakuweza kujipanga tena kucheza vizuri mechi za ndani ambazo zilikuwa muhimu sana kwao ili warudi tena michuano ya Afrika msimu ujao.

Yanga ndio timu yenye kikosi bora pengine kuliko Azam. Lakini mpira hauchezwi katika magazeti. Wakati Azam wakijipanga kimya kimya kwa kuua wapinzani wao kwenye Uwanja wa Chamazi na ugenini, Yanga walitumia muda mwingi kulumbana wenyewe kwa wenyewe.

Kifupi Simba na Yanga zinapokuwa katika hali hii, halafu kuna timu iliyowekeza pesa vizuri na yenye matunzo kwa wachezaji wake, ni rahisi tu kutwaa ubingwa. Tatizo letu tumekariri kwa sababu wakati mwingine timu hizi zinatwaa mataji zikiwa na vikosi vibovu kutokana na ubovu wa timu nyingine.

Ubovu wa vikosi vya Manchester United na Arsenal ulionekana papo hapo mara Jose Mourinho alipokuja England na kuanza kushinda mataji kwa pesa za Roman Abramovich. Sir Alex Ferguson walau alijirekebisha, lakini Arsene Wenger akabakia kuwa jiwe na mbinu zake za zamani.

Na ndicho kinachotokea Tanzania kwa sasa. Hakuna tofauti sana