OMOG: MSIMU UJAO NIDHAMU UWANJANI KWANZA

KAZI ipo mwaka huu, Azam FC inazidi kutamba na sasa Kocha wake Joseph Omog ametamka wazi kuwa, licha ya kutwaa taji la Ligi Kuu Bara msimu uliopita, wachezaji wake walikuwa na nidhamu ndogo ya mpira, hivyo amejiandaa kuwapa mbinu kali kama zinazotumiwa na TP Mazembe ili waende sawa katika Ligi ya Mabingwa Afrika mwakani.

Omog alisema: “Nidhamu ya ndani ya uwanja ninayozungumzia hapa ni ile tabia ya kutofautiana na mwamuzi au wachezaji wa timu pinzani kwa kujibizana nao au kugombana wanapotofautiana. Hilo si jambo la kimichezo linaweza kuiathiri timu wakati wowote na mimi kama kocha, sitaki kuona mchezaji wangu anagombana.

“Ukiwa mchezaji wa kulipwa lazima utambue kazi yako uwanjani ni kucheza mpira tu na hutakiwi kubishana au kugombana na timu pinzani au mwamuzi bila sababu, wapo wahusika watalifanyia kazi, huwa sipendi kabisa tabia hiyo,” alisema Omog.

“Huo ndiyo mpira wa kisasa unaochezwa na timu kubwa zenye mafanikio kama TP Mazembe na nyinginezo duniani nami nataka timu yangu iwe hivyo kwa sababu tunakwenda kushiriki mashindano makubwa ya ligi ya Mabingwa na kukutana na timu za mataifa mbalimbali,” alifafanua.


CHANZO: MWANASPOTI