Chombo: Siondoko Azam ng'o

Ramadhan Chombo 'Redondo'

Kalunde Jamal

KIUNGO Ramadhani Chombo 'Redondo' anayecheza Azam amesema hana mpango wa kuondoka kwenye klabu hiyo kwa sasa. Redondo alisema hakuna kitu kigumu kama kuhama katika klabu iliyokuwa na mafanikio na kwenda sehemu nyingine.

"Sina mapango wa kuondoka Azam kwa sababu ni timu nzuri na yenye malengo ya sasa na baadae hivyo kwa kuwa hapa kiwango changu kinakuwa kwani ni timu inayopanda mwaka hadi mwaka tangu kuanzishwa kwake," alisema Chombo.

Alifafanuwa kuwa huwezi kucheza kwenye klabu bora ukawa sio mchezaji bora hivyo malengo yake ni kuwa mchezaji bora na anaamini atafanikiwa kwa kuwa nacheza kwenye timu bora.

Alisema mara nyingi wachezaji wanahama kutafuta maslahi, lakini kwa sasa hapa nchini hakuna timu gani yenye maslahi mazuri kwa wachezaji wake kama Azam.

"Tumekuwa washindi wa pili wa Ligi Kuu Tanzania Bara, lakini tumefanya vizuri kwenye michuano mbalimbali tuliyoshiriki msimu huu."

"Tumetwaa ubingwa wa Kombe la Mapinduzi kule Visiwani sasa piga mahesabu itakuwaje kwenye msimu ujao wa ligi kama sio kuwa mabingwa wa Ligi Kuu."

"Siondoki hapa ng'o, kwa sababu mwakani tutashiriki Kombe la Shirikisho Afrika ni nafasi yetu kama wachezaji tutapata fursa ya kuonyesha uwezo wetu kimataifa," alisema Chombo.