Azam yajipanga vizuri Kagame

Mshambuliaji wa Azam FC Mrisho Khalfan Ngassa

Jessca Nangawe

KIKOSI cha Azam kinataraji kuingia kambini Juni 8 tayari kujiandaa na michuano ya Kombe la Chalenji itakayofanyika jijini Dar es Salaam katikati ya mwezi ujao.

Kikosi hicho kilichomaliza Ligi na kushika nafasi ya pili kwenye msimamo, kinasubiri kurejea kwa Kocha Stewart Hall ambaye kwa sasa yuko mapumziko nchini England.

Afisa habari wa Azam, Jaffar Iddi alisema jana kuwa wanasubiri kurejea kwa Hall ili kuanza programu ya mazoezi kwa ajili ya mashindano hayo.

"Atarudi mwanzoni mwa mwezi ujao, jukumu lake ni kuandaa timu kwa ajili ya mashindano na pia kusimamia suala la usajili wa wachezaji kwa ajili ya msimu ujao," alisema Iddi.

Kuhusu kambi, Iddi alisema huenda wakaiweka nje ya jiji ingawa hakuwa tayari kuweka bayana ni wapi.

Tanzania itawakilishwa na timu tatu kwenye michuano hiyo, Yanga bingwa mtetezi, Simba mabingwa wa Ligi Kuu msimu huu, na Azam iliyoshika nafasi ya pili.