AZAM FC NGUVU ZOTE LIGI KUU

KLABU bingwa ya Afrika Mashariki na Kati Azam FC wameahirisha mechi yao ya kirafiki dhidi ya Ruvu Shooting na sasa macho yao yanatazama kutulia na kujipanga kwa ajili ya maandalizi ya ligi.

Mechi hiyo ilikuwa ichezwe juzi kwenye uwanja wa Mabatini Mlandizi, lakini haikufanyika huku Msemaji wa Azam Jaffar Idd akiomba radhi mashabiki kwa kushindwa kutokea. Akizungumza na gazeti hili Idd alisema Azam wanafikiria kujiimarisha kwa maandalizi ya ligi kwani muda umebaki mfupi.

“Tunaangalia ligi ambayo iko mbele yetu, tunawasubiri wachezaji wa timu ya taifa ili tuanze kambi kujiimarisha,” alisema. Azam ilicheza mchezo wa mwisho wa kirafiki hivi karibuni dhidi ya JKT Ruvu na kufungwa mabao 2-1 kwenye uwanja wa Azam Complex, Chamazi. Kwa mujibu wa Msemaji huyo, kikosi hicho kitaanza kambi wakati wowote kuanzia kesho.

Timu hiyo inatarajiwa kuanza mchezo wa ufunguzi dhidi ya Prisons katika uwanja wake wa nyumbani. Idd alisema mchezo huo ni muhimu kwao kujiweka vizuri kwani Prisons sio timu ya kudharau kwa vile inaweza kubadilisha matokeo wakati wowote.

Chanzo: Habari Leo