Sure kukosekana mechi 3. Ongala akili ni pengo

BENCHI la Ufundi la timu ya Azam limekiri kukosekana kwa kiungo wake mchezeshaji, Salum Abubakari 'Sure Boy' katika michezo mitatu ya Ligi Kuu ni pengo kubwa kulingana na mchango wake kwenye timu hiyo.

Kocha msaidizi wa Azam, Kali Ongala alisema jana kukosekana kwa Salum Abubakari katika michezo mitatu ni pengo kubwa katika kikosi hicho licha ya kusajili viungo wengi.

Sure amefungiwa mechi tatu na kutakiwa kulipa faini ya Sh 500,000 kwa kosa la kumpiga kiwiko mshambuliaji Semmy Kessy wa African Lyon sawa na Felix Sunzu wa Simba aliyempiga kibao Othman Juma wa JKT Oljoro.

"Tumesajili wachezaji zaidi ya 26 wengi wao wakicheza katika nafasi ya kiungo, lakini wanatofautia uwezo na akili ya kucheza soka," alisema Ongala.

"Sure anaimudu vilivyo nafasi hiyo akisaidiana na Chombo (Ramadhan) na Stima (Jabir Aziz) ambayo kazi yake kubwa ni kuwalisha mipira washambuliaji, Kipre Tchetche, Mrisho Ngassa na John Boko kufunga mabao na kuipa timu ushindi," alisema Ongala.

"Nafikiri ni pengo, tutafanya mabadiliko ya kiungo mwingine, lakini bado Sure Boy atahitajika sana kulingana na aina yake ya uchezaji wake na mfumo ambao tunautumia wa 4-3-3," alisisitiza.


www.mwananchi.co.tz